 |
|
Kemennadenn d’ar mediaoù
Lezenn an 21 a viz Mae 2021 diwar-benn gwarez glad ar yezhoù rannvroel ha brudañ anezho (« Lezenn Molac ») ha kelenn ar brezhoneg : ur reked barnerezhel kaset d’al lez-varn velestradurel a-enep ar Stad
Hon div gevredigezh Div Yezh Breizh, kevread kevredigezhioù tud ar vugale evit ar c’helenn brezhoneg hag e brezhoneg er skol bublik, ha Kelennomp!, kevredigezh ar gelennerien war ar brezhoneg hag e brezhoneg, hag o deus divizet tagañ ar STAD diral al lez)varn velestradurel evit mankoù evit lakaat da dalvezout ar c’hendivizad Stad-Rannvro eus miz Meurzh 2022 evit brudañ ar yezhoù Breizh, hag ar brezhoneg dreist-holl.
Sinet e oa bet ar c’henemglev-se e Roazhon dirak Kentañ ministr ar mare-se, an ao.Jean Castex, gant ar pal lakaat da dalvezout disoc’hoù pleustrek goude bet votet lezenn an 21 a viz Mae 2021 a denn da warez glad ar yezhoù rannvroel ha d’o brudañ, lesanvet “Lezenn Molac”.
Hor bertaerien, ar c’habined Coudray e Roazhon, arbennikaet war ar gwir publik a zo o paouez kas ur reked barnerezhel dirak lez-varn velestradurel Roazhon a-enep ar Stad, dileuriet gant an aotrou Emmanuel ÉTHIS, Rektor rannvro akademiezh Breizh
diouzh ar mellad D.222-35 eus Kod an deskadurezh.
Goude meur a zoare da glask en em glevet gant Rektoriezh akademiezh Roazhon evit lakaat da dalvezout ar c’henemglev Stad-Rannvro Breizh war dachenn an deskadurezh , o deus divizet hor c’hevredigezhioù kas an afer dirak al lez-varn.
Diazezet eo ar reked barnerezhel-se war ar mellad L 312–11-2 e Kod an Deskadurezh , lakat e pleustr gant mellad 7 al lezenn Molac “da-geñver kendivizadoù etre ar Stad hag ar rannvroioù (…) ez eo ar yezh rannvroel un danvez a vez kelennet en eurvezhioù skol er skolioù-mamm, er skoliù kentañ, er skolajoù hag el liseoù e pep lec’h pe en darn eus an tiriadoù ma vez komzet ur yezh rannvroel a-benn kinnig kelenn ar yezh d’an holl skolidi.”
Kaset eo bet ar rekour-se dirak al lez-varn pa n’eus bet sinet kendivizead all ebet etre ar Stad hag ur Rannvro all goude al lezenn Molac daoust m’emañ an holl genemglevioù kazi echu ganto.
Ouzhpenn-se eo bet divizet nevez zo lakaat war-sav ur gefridi kelaouiñ gant ar Sened evit dielfenañ penaos eo bet lakaet al lezenn Molac da dalvezout. Anvet eo ar senedour euskarat Max Brisson da zaneveller.