 |
 |
 |
 |
 |
FEUR-EMGLEV STAD-RANNVRO DIWAR-BENN TREUZKAS YEZHOU BREIZH : KASET DA VLOAVEZH AN ERC’H DU ?
Bountet o doa rouedadoù kevredigezhioù ar strollad Unanet evit ar Brezhoneg ( Diwan, Div Yezh Breizh, Divaskell, Kelennomp ! , Kevre Breizh) evit kas war-raok teuliad ar feur-emglev arbennik war yezhoù Breizh, etre ar Stad hag ar rannvro. Kement-se a oa labour ar strollad a-raok diviz trumm ar c’huzul bonreizhel d’an 21 a viz Mae, da vougañ frankiz pedagogel kelenn ar yezhoù rannvro.
Ur vras ha kaer a vanifestadeg a oa bet d’an 13 a viz Meurzh, bodet enni tost da 5 000 den e straedoù Kemper, skol·idi·adezed, tadoù ha mammoù, tud a-youl vat, sikour·erien·ezed ha dilenn·idi·adezed o c’houlenn ma vije bet savet ha sinet ar feur-emglev-mañ a-raok an hañv tremenet ha dreist-holl a-raok dilennadegoù rannvro miz Even. Embannet en doa Prezidant Rannvro Breizh, Loïg Chesnais Girard, e stourmfe evit kaout ur feur-emglev a live uhel digant ar Stad. Stanket e oa bet ar marc’hata avat da benn-kentañ ar prantad kabaliñ.
Nevesaet eo bet bodad-seveniñ ar rannvro abaoe ouzhpenn 5 miz ha nec’het omp chom hep kaout muioc’h a araokadennoù eget mare nevezamzer ar bloaz-mañ. Da geñver emvod kuzul sevenadurel Breizh ar 4 a viz Kerzu e oa bet goulennet keleier digant Stéphane Perrin, besprezidant ar Rannvro e karg eus ar budjed gant izili eus hor c’hevredigezhioù e-keñver araokadennoù ar marc’hata.
Dre ma n’en deus ket degaset keleier resis hon eus aon e vefe chomet bout an traoù war an teul ha war araezioù roet d’ar c’helenn ha d’an treuzkas yezhoù rannvro. Ret eo da atebeien lec’hel ar rannvro hag ar Stad mont war-raok en un doare fetis war ar c’henemglev-mañ a-raok vakañsoù fin ar bloaz. Goulenn a reomp ouzh ar Prezidant Rannvro kinnig buan an teul-mañ d’ar gouarnamant ha d’ar C’hentañ Ministr.
Tremen a ra ar sizhunvezhioù. N’omp ket hegredik ! Emañ an dilennadegoù prezidantelezh ha kannaded o tostaat hag emaint e risk stankañ ur wech ouzhpenn ar marc’hata. Da grediñ eo an dizober-mañ ur skoilh ouzhpenn ouzh kelenn ar yezhoù rannvro lakaet gant Ministr an Deskadurezh Stad
Gouzout a raimp en em sevel en-dro ! En em gavout a raimp e penn kentañ ar bloavezh a zeu evit ober ur poent.