Aozet e oa d’an 31 a viz Meurzh noz ha d’ar 1añ a viz Ebrel e Landelo er Presbital Kozh staj kentañ Kelennomp ! : “Etre kelaouiñ, preder ha stourm”
D’AR GWENER NOZ : eskemmoù, pred, sonadeg ha plijadur !
A-raok ar sonadeg gant an arzourez GARLONN, bet tapet priz an Taol-Lañs e 2021 hag embannet nevez zo he fladenn gentañ “SPI”, hon doa komzet eus priorelezhioù ar gevredigezh evit 2023/2024 d’ar Gwener noz.
D’ar Sadorn tro d’ar c’helaouiñ ha dreist-holl d’ar preder !
Gant Ofis ar brezhoneg ha gant e rener, Fulup Jakez, hon eus lakaet ar gaoz war ar c’henemglev Stad-Rannvro 2022- 2027: pelec’h emaomp ganti ? ,”dispositif restreint de concertation”, “comité de suivi”… petra eo ? Petra a ya war-raok , petra ne ya ket ! Penaos e vez raktreset ha digoret hentadoù divyezhek nevez, piv a ziviz petra , penaos e za en-dro an divizoù etre ar Rannvro, an Ofis hag an Deskadurezh-Stad ….
Goude e oa bet tro ar preder gant Catherine Adam (enklaskerez e ENSTA Breizh hag er CRBC ) evit kinnig he labour diwar-benn an “divyezhegezh skol”.
Evit gouzout hiroc’h war he labour, e c’hellit lenn e galleg he fennad embannet e-barzh ar gelaouenn “La Bretagne Lingusitique” (CRBC) : Des “bilingues scolaires” dans le paysage socio-linguistique breton ?
Ha goude ar pred … 
Gant Gwenole Larvol e oa bet kinniget e labour tezenn bet soutenet e miz Kerzu 2022 : “peotramant e chomo yezh ar skol ” : broudañ adperc’hennañ ar yezh en hentadoù divyezhek ar skol gentañ ! pe, Penaos lakaat ar skolidi da vont muic’h e brezhoneg ?
Hag evit echu an devezh hag ar staj e oa bet kinniget gant Gildas Grimault e labour “Petra a lak al liseidi da vont e brezhoneg er skolioù dre soubidigezh”
